الوجيه اشباه .. ماتشبه وجيه

السنين / الزرع ... والموت/ الحصاد ..
...................... والوجيه اشباه .. ماتشبه وجيه
من بلاد التيه ..... ياتيه البلاد
...................... مات شاعر ../ رحمة المولى عليه
كان يحكي للزهر " قصة سعاد "
...................... لين ماحس المطر ../ في راحتيه
مانقص مثقال ذره ! ........ إلا زاد
...................... هالحنين .. اللي يسولفني حكيه
ماهمى حظي على ترابي ! .. وجاد
...................... ولانمى صبري على مابي ياهيه
شوفني لاحلم بيدي ../ لاعتاد
...................... بس عندي قلب اخي ما أبيه
شاعرك يدري .. وتدري .. للنفاد
...................... يحتري موته ../ وقلبك يحتريه
أطلق عيونه على طرد .. الرقاد
...................... وانكفت هي هي : تاكل مقلتيه
فوق كل هذا أمانه .. شـ استفاد
...................... غير طعنات من ايدينه.... تجيه
بس تبي تشوفه إذا ربك أراد
...................... شاعر ... تتوسد الغيمة .. يديه
والسواد إن حلّ قله .. ياسواد
...................... هذي طعناته على ماهي .. عليه..!