خمس قصائد رائعة بالعامية المصرية

خمس قصائد رائعة بالعامية المصرية
أشعار إبراهيم البيطري
1- (مرساتي)
لو زعلتي مني في حاجَه يوم انا قلتها
أو ف حاجه مش بأيدي وغصب عني عملتها
قربي مني وامسكي ايديا
وعاتبيني ولومي عليا
دا انتي في كل حته فيا
وعندي بالناس كلها
لو خدتني الدنيا ومعاها توّهتني
أو خانتني فيوم وغدرت وضيعتني
انتي مرساتي وشطي
وانتي رسوماتي وخطي
واللي بيكي فيوم هخَطي
واعلا واهديكي نجمها.
2- (وحشتيني)
في عز انشغالي وحشتيني
ولما أحب أشوفك اغمّض عيني
واحلم الاقيكي وتلاقيني
في حلمي وأملي بيكِي عيني
ولما بشتقلك وبحتجلك
بحلم بيكي وبندهلك
طب هعمل ايه!؟ مانا مش طايلك
ولا خبر عنك بيجيني
في عز انشغالي وحشتيني
ولما أحب أسمع صوتك
أو حتى همسك وسكوتك
أو حتى نَفَسِك في وجودك
افتكر انتي فينك وانا فيني
في عز انشغالي وحشتيني
3- (بتخيِّلك)
بتخيِّلك...
جيَّه لابسه أبيض وعلي راسك طرحه
وبَنُوتَّين شايلين من وَرَاكي الفُستان
وطفلة شايله وَرده وف عنيها فرحه
من بابي داخلين ما بين أجمل بُستان
هَمستيلي بتبركِيلي
وف عنيَّا بِتبُصيِلي
و بقمة الحنان
إيديكي لَمسِت إيديَّا
وعنيكي حَضَنِت عنيَّا
نسيت إني إنسان
حَسّْيت انك ملاكي
ف الجنه عايش معاكي
و ودْعّْنا الحِرمَان
بنطير زي الطيور
بنغوص جِوَّا البحور
وزَادْنَا هِوَّا الحنان
والحب هِوَّا دَوَانَا
ومعدش يفرق معانا
لا زمان ولا مكان
بتخيِّلك…
4- (بكَلِمني)
لما بكلِمِك ببقى بكلمني
وبحس اني من زمان عارفِك
ولما تزعلي بزعل انا مني
ولما أسرح الاقيني شايفِك
وأهِيم في جمالك غصب عني
و فجأه أصحى ألاقيني بضحَك
أداري ضِحكي م الناس ومني
وأقول إمتي أدوق لَمسِك
واشيلِك جوا العين والنني
واضُمِك جِوايا واتنَفِس نَفَسِك
5- (للحب عِزُه)
نفسي اقوله وحشتني
وخايف اكون بعشقه
ويرضاه قلبي حبيب
والنصيب يرفضه
ويبعد بينّا القدر
ويسقيني حسرته
وياخد تاني قلبي
م الحب كسرته
ويرجع ألم الحب
وانسى طعم فرحته
والقلب يعيش بكسرين
بَسّ التالت يمَوّته
وارجع تاني اقول
للحب عِزُه ومَذَلِتُه.