فمان الجرح لا والله فمان احزاني الكبرى

فمان الجرح لا والله فمان احزاني الكبرى
فمان اغلى سنين مت فيها عشان اعيش
فمان الحب واحلام القلوب البيض والخضرا
فمان الااه من كثر الزعل والشوق والتطنيش
فمان عيونك اللي مالها بين العيون أخرى
فمان غرورك اللي علم الطاوؤس نفش الريش
فمان عطورك اللي تسكن أنفاسي وبالأحرى
فمان انفاسك اللي تسكن عطوري ومدري ليش
فمان الليل وأحضان الدفا ومصافح القمرا
فمان الباب والشباك يوم اوعدك ونطيش
فمان التوت والرمان واحلى فاكهه حمرا
فمان الضحكه اللي كنها من مبسمك بخشيش
فمان غيابك اللي ماترك لمواصلك بشرى
فمان الشك وظنون الخطأ والكذب والتشويش
فمان العيد كنه به يجيني وحالتي تزرى
يطبطب فوق اكتافي حزن ويقول لي ماعليش
فمان الجوع وإحساس العطش ومفارقك صحرا
تعبت افتش لواحاتهاواضناني التفتيش
فمان ضلوع مكتوب على احزانها اليسرى
هنا توجد جروحي لو تكرمتي بلا تنبيش
فمان دموع لاتغني ولاتسمن من الذكرى
وانا اللي ماقدرت اطلع من اجوائي معك بشويش
فمان الشارع اللي كل ماجيته وأنا اقرأ
معاناتي من اول يوم في وصلك الى التهميش
فمان الشاعر اللي يجمع بتجربته الصغرى
فكر بدر ورومنسية نزار وفلسفة درويش
فمان الخوف ويدينك جنود وأضلعي أسرى
وانا فيني من الاحباط مايكفي هزيمة جيش
فمان أشياء ماتنقال للعالم ولاتطرى
ممالك حب دمرها الأسى وسياسة التطفيش
فمان الأيش وماادري ولكن الزمان ادرى
وانا اللي ضاع مايدري حبيبه ضيعه لجل ايش
فمان الله ياقلبي مع انك جرح مايبرى
كتب ربي اعيش من دونك وانا مااعيش