الخثرة الكويتية

[˛ ذآتَ حُسن ♔]

الخثره وهي من الأكلات الكويتيه القديمه ما قبل النفط وهي عباره عن مرق سمج وعيش .. عاد الكويتين الأوليين يحبون هالأكله ..

عيش مغسول ونقعه بالماي ونخليه على جنب
وبعدين نبدي بالمرق ... نجيب الزبيدي الحبات الوسط أحلى حق المرق نغسلهم عدل ونفركهم بالملح والكركم وشوي كمون ..
طبعاً تعرفون طريقة المرقه .. بس ألحين بقولها بشكل سريع
3 بصلات مقصوصين اصغار- 4 طماط مقصوصين اصغار- معجون طماط واحد ..
لومي أسود مطحون ولوميه وحده عدله مخرمة - 4فصوص ثوم مدقوق
بهارات سمج وكركم وكمون وزنجبيل طري شويه وكزبره ناشفه مطحونه ملعقتين صباره وطبعاً وملح وماي حق المرقه ...

نحمس البصل والثوم والزنجبيل بشوي ماي لين ينشف ويذوب البصل ، وبعدين الطماط الطري ودهن ونحمس لين يذوب الطماط عدل، وبعدها نحط البهار ومعجون الطماط (ونحمس )ونحط السمجه أنا ما أحط الراس وهذا على كيفكم (طبعا مغسوله من الكركم والملح) وقطعوها وصلتين إذا تبون أو تخلونها تذوب بالمرق كيفكم .. تقلبووون السمج لين يشرب شوي من الحمسه وتحطون اللوميه المقضوضه وبعدين تحطون العيش المغسول (كل مانقع العيش أكثر صارت الخثره طيبه) وبعدين تصبون الماي عليها يكون مستوى الماي فوق العيش بأربع أصابع ،،تطبخ شوي وتشوفون الماي شوي قصر ،، وبعدين تحطون الصباره المنقوعه بالماي من وقت،،وتملحون الخثرة حسب ذوقكم بمكيال الملح ،، وتحطون تحت الجدر حديده وتقصرون النار وتخلون الخـــثره
تخدر مو أقل من نص ساعة بس ونقلب الچدر علشان مايحترق اللي بقاع الچدر
ملاحظه مهمه جداً: كل ماكانت الحمسه متعوب عليها طلعت الخثره ممتازه ولا تنسون الوقت إللي تخدر فيه الطبخه ،،

وبعدين على جنب أنتو مقطعين البصل جوانح وتقلونه بالدهن لين يصير لونه بني (حق الحشو وقت النجاب)

وبالعافيه ...