ياجيل الكورة والتماثيل

ياجيل وينك والطموحات ياجيـــل &&
وين التجلد والأمل والرجولة

وين احتسابك للوعر والتساهيل &&
وين الصدق والجد ماجيت حوله

وين الرحامة في قلوب الرجاجيل &&
وياجيل وين الانتمى للحموله

وين الشعور بشيلة العدل والميل &&
ومن ذا يعاون عاجزً عن حموله

لا تتكل ياجيل وتوفر الحـــــيل &&
مثلك يجي يوم ماله من يعوله

احسب حساب ابعد عن القال والقيل &&
والا عقوبة جيلكم من فعوله

ياجيل من فعلك ترى طفح الكيل &&
مستهترين وسنكم بالطفوله

صار إنتماكم للشوارع وللـــيل &&
لين الفجر سهرات جوله وجوله

ياجيل بعد عن طريق الأباطيل &&
وخف من إلاهك بإتباعك لقوله

ياجيل كفو عن كثير التعاليل &&
الي بعضها مهلكات وخذوله

ياجيل صــرتو للـحمايل غرابيل &&
الله يعدل حالكم عن ميوله

بإيمانكم ياجيل تحـدو السـيل &&
من قبل تشمل بالمهانة سيوله

ياجيل من يحمي الوطن بالقواتيل &&
يادق ناقوس الخطر وللبسوله

لاذبن الخفرات مايشبه الخيل &&
ياجيل لبوهن بحمل القتوله

صبو على العدوان مثل الهماليل &&
من صنعة الكفار بيد الشبولة

من دون من بهن الحيا والتداليل &&
خل المعادي للظواري فلوله

ياجيل صونوا نافذات المكاحيل &&
ترى السيابة فتنةً للخجوله

بالنخوة النخوة تصان المظاليل &&
والغيره الغيره غرام الفحولة

ياجيل غارو ونتخو يامهابيل &&
تمرجلو قبل المنايا العجوله

ياجيل ياجيل الكور والتــماثيل &&
اللي بهن ضاعت معاني البطولة

خل الهمالة ولتفت للمعاميل &&
واجمع بهن الخمس كيف الرجوله

وطرب لسوقتهاعلى كل حلحيل &&
وليا حضر راع النقا عد هوله

خل الشهامه منهجك وشرب الهيل &
جالس هل الطولات تطلع بطولة

وطرد الجهل لاتبدلــه بالتبـاديل &&
ترى الشهايد طلعن الخبوله

طاوع ولي أمرك بلى كثر تعليل &&
ترقى المعالي مرتفع عن سفوله

خذ مختصرها ويش لك بالتفاصيل &
اشرب من الينبوع واترك هضولة

لايسرحنبك لابسات الخلاخـيل &&
مفلح ترى من يقتدي بمهبوله

واحرص على التقوى وراك السوائيل &
بالآخرة والموت قافيك هوله

ماعم كل الجيل برفع وتنزيل &&
كم واحدٍٍ منهم تسرك عموله

وصلوا على الهادي حريب الآضاليل &
صفوة مخاليق الكريم ورسوله