اسراب الطيور

[عيسى العنزي]

( اسراب الطيور )

اللـي يسمونـه حـزن مــا جـفـل اســراب الطـيـور
مـا دام اقصـى همهـا تملـى الحـشـى قـبـل الغـيـاب
لادرهمـت شمـس العصيـر.. ودنقـت بيـن الثغـور
مـا تخلـف الميعـاد.. لوغـدت مـا بيـن نـاب ونـاب
وان عودت لأعشاشها .. مـا مـرت بنقطـة عبـور
ما شالـت همـوم وعتـب ودروبهـا.. كبـد السحـاب
وانا .. لي اللي ما رجيـت غيـره الفـرد .. الغفـور
يهـون جروحـي قبـل لا ذوب فــي وســط الثـيـاب
البارحـه ليلـي سهـر.. واطـلالـة افـكـاري شـعـور
اقـل مـا يمكـن يكـون شـي مـن طـعـن .. الـحـراب
ودانـي اطـراف الـهـلاك وحطـنـي خـلـف البـحـور
لـكـن توسـمـت الـعـفـو بالله عـــن درب الـذهــاب
مريـت فـي كـل الظـروف وعقـرب الساعـه يـدور
سهـران ليـن اخـر نجـوم اللـيـل ودعـنـي وغــاب
ودعيـت مـا دام الصبر..اجمـل علـى عـزم الامـور
ما همني لو كان اشوف الـدرب مـن خـرم العـذاب
واقول ما دام الشعر .. صاحب وفي شهـم وغيـور
مـن يـوم خاوانـي وانـا مـا بيـنـي وبيـنـه حـجـاب
اللـي ليـا منـي دعيـتـه جا..تـواضـع مــن غــرور
كنـي بريتـه مـن بـنـات الفـكـر ..سـددتـه وصــاب
اجيب من جمر..الهجوس وضيقتـي عـود وبخـور
وارفـع مقامـي عـن مقـام اهـل المـلامـه والعـتـاب
يالله تقدرنـي علـى دربـي وانــا.. طبـعـي صـبـور
مثل الجمل لامن بـرك للحمـل مـا يحسـب احسـاب
اعـوذ ..بـك مـن غامـض العلـم وتناهيـت الصـدور
مـن شـر ..حاسـدن مـا تمتـلـي عيـنـه الا..تــراب
علمتـنـي مـالـم اكــن اعـلــم..لآن( الـعـلـم نـــور)
واسقيتنـي مـن فضلـك اللهم مـن عيـن الـصـواب
صحيـح مـن غـدر.. الزمـن والآلسنـه دمـي يفـور
كـنـه قــدور الأجــودي لا نـوخـت حـولـه ركـــاب
لاشـب نـار .. وزمجـرت ترحيـب بطـوال الشبـور
يـوم الـردي مـا همـه الا الهرولـه خلـف الـسـراب
ما دام عمره ما نبت عرق اخضر بروس الصخور
المجـد مـا يعطـى لمـن قفـل مـن دون الطيـب بـاب
لـذا قنصـت ومـا معـي الا .. عديـم مــن الصـقـور
عقب البطـى كنـه يقـول اليـوم بـس الجـرح طـاب
مديـت لــه كـفـي تنـهـض والتـفـت لفـتـة جـسـور
اومـيـت لــه بـيـدي تـولـم وابـتـدى جــز الـرقـاب
اليـن واريـت الحـزن والضيقـه بجـوف السـطـور
وعودت مـع دربـي وقنـاص الفلـس يطـرد غـراب

بقلمي / عيسى العنزي

[سلطان الزين]

صح لساااااانك

[عواد الهران]

بارك الله فيك...

جزاك الله خير الجزاء,

ولك الشكر والامتنان,

والتميز بكمن بما نستفيد ونفيد,

وقمة التفاعل:

بالرد عليكم ,وتلقي ردودكم الكريمه.

[fyz.116]

صح لسانك قصيدة روعة لاكن فيها ابيات

المفروض انك تطرح معانيها للقراء



مثل هالبيت


كـنـه قــدور الأجــودي لا نـوخـت حـولـه ركـــاب
لاشـب نـار .. وزمجـرت ترحيـب بطـوال الشبـور




تنوخ حول قدور الجودي

من متى قدور الجودي تشرب منها الجمال


والشطر الثاني غير مفهوم

زمجرت و طول الشبور



حبيت اعلمك لو نجلس

نكتب معاني القوافي

ماخلصنا لان اللي ماعنده لغة العرب

لن يفهمها عندنا اهل الجنوب عارفين معانيها

وفيه شي عندكم مانعرف معانيه



لذا خلك سلس ولا تنق

وان كانت الغة العربيه صعبه عليك

اقر القران وتعلم من القران يوضح لك كل شي


وسلامتك

[عيسى العنزي]

المشاركة الأصلية كتبت بواسطة fyz.116

صح لسانك قصيدة روعة لاكن فيها ابيات

المفروض انك تطرح معانيها للقراء



مثل هالبيت


كـنـه قــدور الأجــودي لا نـوخـت حـولـه ركـــاب
لاشـب نـار .. وزمجـرت ترحيـب بطـوال الشبـور




تنوخ حول قدور الجودي

من متى قدور الجودي تشرب منها الجمال


والشطر الثاني غير مفهوم

زمجرت و طول الشبور



حبيت اعلمك لو نجلس

نكتب معاني القوافي

ماخلصنا لان اللي ماعنده لغة العرب

لن يفهمها عندنا اهل الجنوب عارفين معانيها

وفيه شي عندكم مانعرف معانيه



لذا خلك سلس ولا تنق

وان كانت الغة العربيه صعبه عليك

اقر القران وتعلم من القران يوضح لك كل شي


وسلامتك

اتقبل نقدك

ولكن من جاب طاري الشرب

القدور معروفه اللي ينطبخ فيها

والاجودي الكريم

نوخت الجمل لما يجلس على الارض ينوخونه يقعدونه
زمجرت صاحت

طول الشبور هم اهل الفعايل والعلوم الغانمه

ممتن لك
وتقبل احترامي

[حلا ليالي]

صح لسانك
سلمت اناملك
كلمات جميلة

ختم و تقييم وإعجاب و مكافأة الحصري 200 سبق نشرها و تنبيه

[حلا ليالي]

تمت الاضافة
لا هنت

[توت احمر]

ليت الحزن مثل ألسُهر أخر دروبه فجر .
عيسى العنزي
صح لسانك مدد بلا عدد
للحزن موانئ وشطآن على يابسة الشعر
اكثر ما يوصل الشعور للأخرين هي لغة الحزن
فأهلاً بهذا النزف الذي يشبه العزف
باقات من التوت والورد :jn22:

ساكتفى بالمرور على صفحتك اخي العزيز...........
دون رد او تعقيب فربما تكون شهادتي مجروحه
تقبل منى اجمل تحيه واجمل تقدير ..

معزوفة رائعة ترنمنا بلحنها
داعبت أوتارقلوبنا
تراقص على أنغامها نبضنا
دمت بكل الحب والخير
ودي وتقديري وتقيمي